La tiarza etappa dalla deponia ei en construcziun

La Regiun Surselva ei vidlunder d’engrondir la deponia en siu stabiliment a Plaun Grond/Rueun. Igl ei la tiarza etappa dapi ch’ins ha aviert quei menaschi igl onn 1986. Igl ei in impurtont pass per garantir la futura dismessa da rumians dalla Surselva e dil cantun Grischun. Ils 20 d’avrel ha la fasa da construcziun entschiet.

La capacitad dil secund sectur che vegn actualmein utilisaus, vegn ad esser emplenius diltut igl onn 2021. Per garantir alla regiun era egl avegnir la dismessa da rumians baghegia la Regiun Surselva actualmein la tiarza da totalmein quater secturs resp. etappas da deponia. La nova cumpeglia ina surfatscha da strusch treis plazs da ballapei e vegn a porscher plaz per la deponia finala da varga 300’000 tonnas rumien dils tips D ed E. Leutier s’auda per exempel tschendra ord la barschera dalla GEVAG a Trimmis ed ord ils implonts da producir calira, material da scavaments ord loghens contaminai, gliet dallas schubergiadas da vias sco era asfalt cun surdosa dalla materia nuscheivla PAK.

Igl ei zun impurtont ch’il menaschi da deponia vegn buca interruts. Pertgei: rumien dat ei mintga di – e las pusseivladads da deponer el cantun tschendra ein scartas. Per material contaminau da scavament e substanzas da baghegiar contaminadas sco era gliet dalla schubergiadas da vias ed ulteriurs rumians dil tip E ei la deponia regiunala a Plaun Grond schizun la suletta el Grischun. Ton pli impurtont eis ei stau da survegnir la lubientscha per saver projectar quella tiarza etappa e cull’entschatta dalla fasa da baghegiar ei il basegns dils proxims dus decennis garantius.

Ovra cun ault standard tecnic

La tiarza etappa da deponia ch’ei gest lantschada ei in ovra da construcziun d’ault standard tecnic. Gl’implont dispona d’ina barriera tecnica, el ei concepius cun in horizont da deflussiun surterrester ed in horizont da controlla sut la stuppadira da bitumen. Plinavon baghegian ins ella surfatscha dalla deponia dus chilometers lingias ed in sistem cun tumbins che survescha per controllar e pumpar las auas che serimnan. Culs sediments d’arschella digl anteriur lag prehistoric da Glion ha quella tiarza etappa da deponia ina barriera supplementara natirala e geologica. Quei lag da Glion fuva seformaus avon 9500 onns suenter la gigantica bova da Flem. Il project ademplescha en scadin cass tuttas disposiziuns legalas e normativas per deponias da quels tips e corrispunda al stan actual dalla tecnica da deponia.

Creaziun da valur regiunala

Il project da baghegiar caschuna cuosts da rodund 6,5 milliuns francs. El sereparta sin treis sorts lavur ch’ins ha surdau publicamein il mars 2020. La gronda part dalla creaziun da valur, sco era gl’accumpignament dil plazzal da baghegiar fan interpresas e biros dalla regiun. Igl ei in sustegn per l’economia regiunala, quei ch’ei cunzun actualmein da special gronda muntada.

Ussa vali da realisar tochen la fin digl onn 2020 il project ambizius. Igl ei ins sfida – malgrad temps da Corona – d’arver tenor plan la tiarza etappa da deponia sill’entschatta dil 2021.

La deponia regiunala Plaun Grond

La Regiun Surselva meina dapi gl’onn 1986 ina deponia da reactur e da gliet a Rueun-Plaun Grond. Quella ei ina part integrala enteifer il management da rumien dalla regiun e garantescha la deponia finala professiunala da rumien cun qualitad da reactur e materia restonta.

En ina emprema etappa han ins deponiu denter ils onns 1986 tochen 2000 rumiens da casa senza barschar sco era rumians da plazzals da baghegiar. Igl onn 1996 han ins aviert la secunda etappa da deponia. Dapi lu han ins empleniu quei sectur cun material da reactur e tschendra ord la barschera da rumians. Quella etappa ei ussa plaunsiu emplenida diltut e la capacitad ei contonschida.

Ilanz/Glion, 27 d’avrel 2020

Per ulteriuas informaziuns: Duri Blumenthal, meinagestiun, 081 926 25 00