Informaziuns
Recicladi Surselva
La Regiun Surselva procura tenor las perscripziuns dalla confederaziun e dil cantun per in'economisaziun da rumien cunvegnenta ella regiun che schanegia la natira.
La finanziaziun succeda sur ina taxa fundamentala ed ina taxa d’emballadi tenor prestaziun.
Taxa fundamentala
Ils cuosts dil menaschi che vegnan buca finanziai culla taxa tenor prestaziun vegnan cuvretgs culla taxa fundamentala annuala silla basa dalla valeta dalla segirada d'edifezis. Naven digl onn 2013 munta la taxa fundamentala a 0.17‰ dalla valeta d'assiguranza.
Tgi ha da pagar la taxa fundamentala?
Tgi ch'ei igl 1. da schaner proprietari, proprietari da cuminonza, cunproprietari, proprietari en condomini ha da pagar la taxa fundamentala. Midadas ella valeta dalla segirada e midada da proprietari el decuors digl onn vegnan risguardadas pér el proxim onn. Il tschentar quen vinavon (cumpensaziun ulteriura) dalla taxa fundamentala ei caussa dil proprietari.
Factur da rimanda
Il factur da rimnada munta ad 1.0 tier in transport per jamna ed 1.5 tier dus transports per jamna.
Taxas tenor prestaziun
Quella taxa cuviera cunzun ils cuosts pil cargar entuorn (trascargar), il transport a liunga distanza e la elavuraziun pils rumians barscheivels e buca pli utilisabels. La taxa d'emballadi ei da pagar per mintga svidada ni per emballadi.
Taxa directa da consegna
Per rumians che vegnan furni al stabiliment per economisar rumien a Plaun Grond senza la taxa d'emballadi eis ei da pagar ina taxa corrispundenta.
Rauba blocconta
Per rauba blocconta che vegn furnida entras las vischnauncas eis ei buca da pagar ina taxa.
Disposiziun penala e giurisdicziun
Tgi che depona emballadis e rauba blocconta senza la taxa d'emballadi vegn castigiaus dalla regiun surselva cun 100.- francs ed en cass da repetiziun cun 200.- francs. Tenor lavur vegn ei aunc tschentau quen per l'inquisiziun e la taxa da copiatura da 80.- francs sco era ina taxa da dimessa da 50.- francs.
Basa legala
- Statuts dalla Regiun Surselva
- Ordinaziun davart l'economisaziun regiunala dil rumien
- Ordinaziun executiva all'ordinaziuns davart l'economisaziun regiunala dil rumien
- Directivas per fixar ils facturs da producziun
La Regiun Surselva exequescha l'economisaziun da rumians en tut las vischnauncas dalla Surselva.
