Lètg

Maridar la sonda ei pusseivel!

Vus vuleis maridar? Nus selegrein sin Vus. Spusai che maridan en Svizra s'annunzian tier igl uffeci civil dil liug da domicil svizzer dalla spusa ni dil spus. La procedura da preparaziun sa vegnir introducida per cura che las premissas per la maridaglia ein ademplidas, en special per cura ch'ils spusai han cumpleniu il 18avel anniversari. Ei ina communicaziun verbala cugl uffeci civil buca pusseivla, ston ils spusai organisar sin agens cuosts ina translatura ni in translatur per la procedura da preparaziun sco era per la ceremonia d'enzinnaziun.

Il termin per la maridaglia reservein nus sil pli baul 1 onn avon il datum giavischau.

Preparaziun

Per che Vus saveis maridar, sto la procedura da preparaziun esser terminada tier igl uffeci civil responsabel (il pli baul treis meins avon la ceremonia). Spusai svizzers basegnan leutier in passaport/ID e sch'els ein buca domiciliai el cantun Grischun in attest da domicil actual. Spusai digl exteriur informein nus bugen davart ils documents basigneivels. Per plascher contactar nus ad uras.

La procedura da preparaziun vegn introducida cun inoltrar il formular"Damonda per la preparaziun dalla maridaglia". Leutier aschuntar per plascher ils documents sura menziunai. Haveis Vus damondas en connex cun Vies num e quel dils affons saveis Vus consultar il "Fegl d'informaziun davart il num suenter la maridaglia". Suenter l'examinaziun da Vos documents envidein nus Vus alla procedura da preparaziun. Vossa identitad vegn examinada e silsuenter emplenin nus communablamein divers formulars. Vus haveis da declarar cun tgi che Vus vuleis maridar e che Vus adempleschies las premissas legalas. Ein quellas ademplidas tenor l'ordinaziun dil stadi civil, communichein nus a Vus che la maridaglia sa haver liug enteifer treis meins. Per l'enzinnaziun civila basegna ei duas perdetgas.

Ha l'enzinnaziun civila liug ordeifer il cirquit dalla Surselva, retscheveis Vus ina autorisaziun da maridaglia. Cun quella ei ina enzinnaziun civila pusseivla tier mintga uffeci civil en Svizra.

Marideis Vus egl exteriur, basegna ei eventualmein in certificat da habilitad matrimoniala.

Enzinnaziun civila

Spusai e perdetgas ston presentar a caschun dall'enzinnaziun in document d'identitad ufficial cun fotografia. En nies cirquit stattan 14 locals a disposiziun persuenter. Vus anfleis en nos bials vitgs denter 700 - 1400 m.s.m. segir enzatgei adattau.

Gliendisdis - venderdis saveis Vus maridar naven dallas 08.30 entochen las 11.30 e naven dallas 14.00 entochen las 17.00. La sonda ei ina ceremonia per regla pusseivla naven dallas 08.30 entochen las 16.00.

Dus locals extraordinaris stattan a Vossa disposiziun. Ella Casa Gronda a Glion saveis Vus maridar en in local pompus. Sche Vus tschercheis aunc in local pigl aperitiv, stat il tschaler da vin medemamein a Vossa disposiziun.

A Trun, ella Cuort Ligia Grischa stat l'anteriura sala da dertgira sco era la stiva digl avat a Vossa disposiziun. Igl aperitiv ei medemamein pusseivels cheu en casa sco era en curtin.

Per quellas localitads vegn quintau ina taxa.

Taxas

Per la procedura da preparaziun e per l'enzinnaziun civila vegn incassau ina taxa tenor ordinaziun federala.