La regiun surselva ei ina corporaziun dil dretg public cun atgna persunalitad giuridica. La Surselva cumpeglia il territori denter igl Uaul Grond e la tgina dil Rein al Péz Badus cun las valladas lateralas Lumnezia, Stussavgia e Medel. La Surselva dumbra 44 vischnauncas e dispona d'ina populaziun da 25'275 persunas (dumbraziun dil pievel 2000).

La regiun surselva ha per mira da migliurar a liunga vesta las cundiziuns economicas e socialas dalla regiun sco era da promover la collaboraziun regiunala. Sco purtader regiunal da svilup renconuschius dallla Confederaziun e dil Cantun tenor la lescha federala davart igl agid d'investiziun s'occupescha la regiun surselva denter auter cun l'intermediaziun d'emprests d'investiziun per l'infrastructura da basa e da svilup, denton era cun la planisaziun directiva regiunala e cun l'economisaziun dil rumien. Plinavon meina ella la scola da musica ed il survetsch logopedic.

Tenor ils statuts remplazza la regiun surselva el rom da ses pensums las vischnauncas colligiadas. El decuors dils davos 15 onns ha la Surselva fatg atras ina gronda midada da structura ed ella ei vegnida bein a strada cun quella situaziun. Ellas branschas cun gronda creaziun da valur ha ei dau numerusas novas plazzas da lavur. En tut eis ei vegniu creau denter 1985 e 2000 pli che 1'000 plazzas da lavur ni pli che 10 pertschien digl entir diember da plazzas da lavur. Quella midada structurala demuossa la gronda vitalitad dalla regiun.

 Richtplan Alpen