Roger Tuor niev meinafatschenta dalla Regiun Surselva

La cumissiun regiunala ha eligiu Roger Tuor da Mustér sco niev meinafatschenta dalla Regiun Surselva. Signur Tuor ha absolviu suenter la matura il seminari da scolasts e silsuenter la scolaziun sco meinascola. En quella funcziun eis el oz activs a Mustér.

Plinavon ei Roger Tuor staus duront numerus onns vicepresident dalla vischnaunca da Disentis/Mustér ed ultra da quei eis el staus commember e president dil parlament regiunal dalla Surselva. Aschia enconuscha el ton la politica communala sco la politica regiunala fetg bein ed ha aschia ina buna reit da contacts en Surselva. Sco meinascola dispona el era da fetg bunas premissas per la direcziun generala dil Center da formaziun Surselva cun la scola media prepedeutica e la scola media mercantila, la scola professiunala industriala, la Scola Vinavon sco era la scola da musica ed il survetsch logopedic. Signur Tuor ha 50 onns, ei maridaus e bab da treis affons. El vegn a surprender sia nova incarica igl 1. d’uost 2023 da Duri Blumenthal che va suenter 23 onns en pensiun.

Il meinafatschenta ei il menader operativ dalla Regiun Surselva sco era dil Center da formaziun Surselva cun varga 100 conluvreras e conluvrers. Ultra da quei ei il meinafatschenta responsabels per la planisaziun directiva regiunala, il svilup regiunal, il recicladi Plaun Grond, las finanzas e la contabilitad sco era pil persunal. Plinavon fungescha el sco post da stab per la cumissiun regiunala e la conferenza dils presidents, el prepara ils documents per las decisiuns da quels gremis e procura per l’execuziun dils conclus corrispundents. Il meinafatschenta ha la funcziun da scharnier denter las vischnauncas ed il cantun cun agid da cunvegnas da prestaziun per las incaricas delegadas.

Glion, ils 23 da november 2022