Partenadi registrau

Vus vuleis registrar Vies partenadi?

Dapi igl 1. da schaner 2007 san pèrs da medema schlatteina schar registrar lur partenadi tier igl uffeci civil e daventan aschia ina cuminonza da veta cun dretgs ed obligaziuns claramein definai.

Persunas che sedecidan per ina tala cuminonza da veta, sedrezzan tier igl uffeci da stadi civil d'in da lur loghens da domicil. La procedura da preparaziun sa vegnir introducida per cura che las premissas fundamentalas ein ademplidas, en special cura che omisduas persunas han cumpleniu il 18avel onn da veta.

Ei ina communicaziun verbala cugl uffeci civil buca pusseivla, sto il pèr organisar sin agens cuosts ina translatura ni in translatur per la procedura da preparaziun sco era per la registraziun.

Preparaziun

Analog alla lètg vegn menau atras ina procedura da preparaziun. Per obtener sclariment davart ils documents necessaris saveis Vus contactar nus telefonicamein. Il fegl d'informaziun "partenadi registrau" porscha ulteriur sclariment. Suenter inoltraziun dil formular "Damonda per ina registraziun da partenadi" e dils documents persunals, retscheveis Vus in'invitaziun da cumparer tier igl uffeci civil. Cheu haveis Vus da suttascriver il formular "Declaronza en connex cun las premissas pertuccont la registraziun d'in partenadi".

Uss ei la procedura da preparaziun terminada. Sil pli tard 3 meins suenter sto la documentaziun succeder.

Ha la documentaziun buca liug el cirquit da nies uffeci civil, retscheveis Vus ina autorisaziun. Cun quei document ei la registraziun pusseivla tier mintga uffeci civil en Svizra.

Attest dil partenadi registrau

La documentaziun sa succeder immediat suenter la terminaziun dalla procedura da preparaziun. Per la documentaziun cun ceremonia valan arisguard temps e liug las medemas reglas sco per ina enzinnaziun civila.

La documentaziun basegna neginas perdetgas. Igl emploiau ni l'emploiada digl uffeci civil confirma la declaronza da partenadi tras suttascripziun. Il stan civil senumna ussa "en partenadi registrau".

Taxas

Per la procedura da preparaziun sco era per la documentaziun vegn incassau ina taxa tenor ordinaziun federala.