La Ruinaulta, la planira dalla Greina ni la tgina dil Rein al Lag da Tuma ein senza dubi monuments naturals da renum naziunal ed internaziunal. Ultra da quellas perlas porscha la Surselva denton era nundumbreivlas cuntradas cultivadas, objects naturals ni loghens culturals ch’ins viseta il meglier cun in bike sin ina dallas numerusas turas. La paletta per bikers en Surselva ei vasta e tonscha naven da singletrails, jumps, uphills, downhills, maratons sur funparks tochen a turas da bike normalas. Las rutas meinan sur pradas verdas, sin alps, sper cascadas ni pézs imposants che fan batter il cor da mintgin. Tgi che vul guder la vasta purschida d’ina entira regiun da bike – che ha la finala la grondezia dil cantun Lucerna – sa far quei cumadeivlamein sur www.surselva.ch. Sin quella pagina san ins retrer tut las informaziuns davart las singulas turas ni cargar giu ellas sco datas da GPS.

Cun la plattaforma da GPS vul la Regiun Surselva metter sut in tetg la purschida da bike dall’entira regiun, quei el rom d’in project dad InnoTour. Sin nossa pagina anfleis Vus las purschidas las pli interessantas da Flem/Laax, Sedrun/Mustér, Lumnezia, Sursaissa, Breil sco era dalla Val S. Pieder e dalla Val Stussavgia. Ultra da quei saveis Vus era reservar entirs packages. Ei secapescha da sesez che las singulas purschidas cuntegnan tut las indicaziuns impurtontas davart las rutas, denton era davart auters temas interessants. Ils temps ch’ins stueva prender cun ins tschien cartas per ir d’ina destinaziun a l’autra ein vargai.

Ina purschida aschi vasta ei singulara ell’entira Svizra e predestinescha la Surselva sco regiun da bike cun ina purschida cumplessiva ed attractiva.

Ei legrass nus d’astgar beneventar Vus ella Surselva sin ina tura da bike ni a caschun d’ina dallas numerusas occurrenzas da bike.

Cordial beinvegni ella regiun da bike Surselva!