- Fontauna: Atgna illustraziun, datas Uffeci per economia e turissem
All’entschatta dils onns 1990 ei la populaziun carschida fermamein el cantun Grischun ed en Surselva. Quei svilup ei d’attribuir alla buna situaziun economica ed al boom dil turissem colligiaus cun quella. La populaziun permanenta dalla Surselva munta dapi 1991 a ca. 26’000 habitontas e habitonts. Cunquei che la populaziun vegn tendenzialmein pli veglia, ei il diember dalla populaziun buca sesminuius.
Las suandontas illustraziuns muossan il svilup dalla populaziun relativ en Surselva denter 1980 e 2005.
Naven digl onn 1990 ei la populaziun sesviluppada a moda positiva surtut els centers turistics (Flem, Laax, Falera, Sedrun, Mustér, Breil, Sursaissa e Val S. Pieder) ed el center regiunal Glion cun sias vischnauncas vischinas.
Igl augment dalla populaziun en Tujetsch naven digl onn 2000 ei d’attribuir al plazzal dalla Neat (Alp Transit), che ha purtau alla regiun numerusas plazzas e forzas da lavur, ed ulteriuras entradas alla restauraziun.
Glion ei il center regiunal dalla Surselva cun las pli biaras plazzas da lavur. Ils pigns vitgs ella vischinonza da Glion ein predestinai sco loghens da habitar.
- Fontauna: Atgna illustraziun, datas Uffeci per economia e turissem, Uffeci federal per statistica
- Fontauna: Atgna illustraziun, datas Uffeci per economia e turissem, Uffeci federal per statistica
La suandonta illustraziun muossa co la cumpart dalla populaziun pli veglia ei s’augmentada dapi ils onns 1970 el cantun Grischun ed en Surselva. La cumpart dalla “populaziun cun activitad da gudogn” (persunas da 15 entochen 65 onns) ei restada relativamein constanta naven da 1970 entochen 2000. Sereducius ei en emprema lingia il diember dils giuvenils.
La secunda illustraziun muossa claramein che la pli gronda gruppa da vegliadetgna dall’entira populaziun sursilvana vegn adina pli veglia. Mintga diesch onns semova il maximum dalla curva corrispundenta viers dretg. Facit: la vegliadetgna media dalla populaziun crescha dapi ils onns 1970.
- Fontauna: Atgna illustraziun, datas Uffeci per economia e turissem, Uffeci federal per statistica
- Fontauna: Atgna illustraziun, datas Uffeci per economia e turissem, Uffeci federal per statistica
La quota da naschientschas regressiva meina all’inveteraziun dalla populaziun. La suandonta illustraziun muossa il svilup dallas naschientschas en Surselva cumparegliau cun quel dil cantun Grischun denter 1911 e 2005; la quota da naschientschas ei sesbassada fermamein ils onns 1960 e naven digl onn 1995.
Il svilup dallas naschientschas els singuls cumins dalla Surselva presenta il medem maletg. Ils onns 1960 ein naschi ella Cadi dapli affons che oz ell’entira Surselva, malgrad che la populaziun dalla Surselva ei aunc mai stada aschi gronda sco ussa.
