|
El rom dalla sessiun 2006 a Flem ha la Regiun Surselva organisau tier tut las scolas dil scalem secundar I e II ina concurrenza d'ideas ch'ei vegnida gudignada dalla scola dil scalem superiur da Sursaissa (scolast Josef Nigg) cul project "Surselva - Florida dalla Svizra." Quei project cuntegn numerusas excellentas propostas, ideas e visiuns co la natira ed igl ambient social san vegnir tratgs nez sco purschidas attractivas per persunas attempadas. Cun nezegiar igl existent e cun crear novas purschidas duein resultar cundiziuns generalas attractivas per motivar seniors e senioras d'ordeifer la regiun da passentar lur serasontga en Surselva.
La FHS da S. Gagl ei vegnida incumbensada dalla Regiun Surselva d'elaborar in concept da management pil project dalla scola da Sursaissa. Finamira ei stada in'analisa dil potenzial per dar impuls economics cun agid dalla generaziun 50plus. Sco gruppaziuns ein adattadas specialmein: Grischuns/Grischuns ella Bassa, persunas dalla Svizra orientala e proprietaris da secundas habitaziuns. Il project muossa en quei connex igl enorm potenzial da quellas gruppaziuns, denton era ils cunfins per la Regiun Surselva.
Aspectativas ha quella gruppa da 50plus oravontut pertuccont la natira, la ruasseivladad e recreaziun, il provediment medicinal, las pusseivladads d'habitar ella vegliadetgna, las colligiaziuns dil traffic public sco era concernent ils contacts socials e las pusseivladads da shopping.
L'analisa da SWOT per la Surselva demuossa fermezias sil sectur dil provediment da basa medicinal en cumbinaziun cun ina buna purschida sil sectur da casas da tgira cun l'integraziun da habitadis per attempai e sil sectur dalla natira cun in'aulta qualitad dall'aria e dall'aua. Fleivlezias ein denton las relaziuns disfavoreivlas dall'aura e dallas vias duront igl unviern, ils deficits concernent la construcziun d'habitaziuns per attempai, il manco d'urbanitad sco era la munconza da persunal qualificau.
Sco directiva strategica vegn proponiu en vesta alla generaziun 50plus per la Surselva ina strategia da nischa en colligiaziun cul turissem e l'economia/il mistregn. La Surselva duei en quei connex buca proclamar ina strategia che tschenta la tematica dils seniors el center, mobein empruar da render pli attractivs ils centers regiunals pils seniors e motivar cun claras finamiras quella gruppaziun da prender dimora en Surselva. Per realisar quella strategia vegnan proponidas 14 mesiras tenor urgenza, impurtonza e priorisaziun. Differentas mesiras impurtontas ein realisablas senza gronds cuosts enteifer cuort termin.
Nus essan s'occupai intensivamein ils davos onns ella regiun dalla tgira ed assistenza ambulonta e staziunara dallas persunas attempadas. Quella sparta vegn era el futur ad esser da muntada essenziala. La generaziun futura da seniors e senioras vegn denton ad haver autras pretensiuns. Quella generaziun dispona dallas resursas finanzialas, ei individualmein fetg mobila ed ha aultas pretensiuns concernent l'organisaziun dalla veta. Ina participaziun e cheutras ina integraziun dalla populaziun attempada per models d'habitar futurs ei pia indispensabla. Persuenter drova ei ina strategia cumplessiva. Nus disponin ella Regiun Surselva da numerusas resursas sin differents secturs. Lein pia optimar quellas resuras en favur da nossas gruppas en mira sco era pigl aventatg da nossa regiun en fuorma da plazzas da lavur supplementaras.
 project da praxis dalla FHS S. Gagl
|
